أول مرة ترقصى تانجو معايا .. !
كنت دايما بقول لك ان صوتِك أحلى من صوتى فى الغنا .. صوتك كان جميل أوى وأنا مبعرفش أغنى
بس كنت بعرف ارقص ؛ احسن من اى حد .. وانتى للاسف مبتعرفيش ترقصى !
النهاردة أول مرة نرقص سوا .. صحتينى من النوم الصبح وقلتيلى تعالى نرقص ؛ تخيلى .. رقصتى معايا تانجو !
وفضلتى حاضنانى وبتلفى بيا كتير أوى .. بقيتى بتعرفى ترقصى كويس خالص
كنتى أمورة أوى .. كان شكلِك حلو كأنك صغرتى عشر سنين لورا !
وأنا ابتسمت ؛ وقلتلك انك فى كل الحالات كنتى دايما احلى وارق منى .. بس النهاردة انتى مضاعفة الجمال :)
ضحكتى وقلتيلى أنا لبست حلو كدة عشان ارقص معاكى !!
بس فجأة بابا دخل هو وإيمان ؛ معرفش كانت بتعمل ايه عندنا !
لقيتهم بيبصولى باستغراب وبيسألونى بترقصى مع مين
قلتلهم مع ماما ولسة بلمِسك .. ملقيتكيش
لقيتنى حاضنة الهوا .. وانتى مشيتى !
بعد شوية سمعت اصواتهم من بعيد وفضلت مدمعة ومشدوهة وأنا باصة لمكانك وانتى بترقصى معايا
بس حسيت بايدين بابا حواليا بيفوقنى
كنت بحلم ! .. لقيته بيصحينى وأنا مدمعة وقاللى انى كنت بنده عليكى وأنا بعيط بصوت مكتوم
من نفس السرير اللى جيتى انتى من شوية وصحتينى منه ورقصنا سوا جنبه ..
فضلت باصة شوية لمكان ما كنتى معايا هنا من شوية ورقصنا .. كنت مرتاحة أكتر وأنا بلمس الهوا بايديا مكانك
بس أنا واثقة انك كنتى هنا فعلا .. بشكل أو بآخر
النهاردة كانت خطواتك مظبوطة اوى معايا فى التانجو .. وأنا مكنتش متدايقة من انى مبعرفش اغنى معاكى
كل حاجة كانت مظبوطة علينا تمام كأنها متفصلة
ورغم انى دمعت كتير وحسيت بنفس الوخزة فى نفس المكان لما مشيتى .. وبرغم انك وحشتينى
بس كنت مبسوطة .. وانتى كمان
بس سألت نفسى وأنا بفتكر الأحلام بتاعتى وأنا صغيرة ؛ اللى كنت بحكيهالك ؛
لما كنت دايما بتوه فيها واكتشف اماكن جديدة فى العالم لوحدى ؛
كنتى بتقوليلى ان دى رغبات عقلى الباطن المستمرة عن السفر والاستقلال وتضيفى بيأس رقيق "اللى هيجننوكى ويسرقوكى من حياة أحلى بكتير هنا عشانك" بس لان خوف بابا عليا بيدايقنى وبيقيدنى فبحاول احققها فى الحلم
كنتى بتفسريها كدة " التوهة يعنى السفر ولف العالم ؛ ولوحدى لانى دايما عاوزة اعيش لوحدى"
وكانت كل خطوة فيها بتبقى مظبوطة أوى بجد .. بس فى الحلم !
ليه كل حاجة بتبقى مظبوطة أوى .. بس فى الأحلام وبس !
الاشتراك في:
تعليقات الرسالة (Atom)
0 التعليقات:
إرسال تعليق